ඇමිටිවිලා | Amityville

ලෝන්ග් අයිලන්ඩ් නම් වූ ප්‍රදේශයේ ජීවත් වු රතු ඉන්දියානුවන්ට තම නිජබිම අහිමි විය. ඊට හේතුව වූයේ ඉංග්‍රීසින් හා ඕලන්දක්කාරයින් මේ භූමිය වෙනුවෙන් සටන් කළ නිසාවෙනි. තම නිජබිම ආරක්ෂා කර ගැනීම සදහා ටකපුෂා නම් රතු ඉන්දියානු නායකයා දිවි හිමියෙන් කැප විය.

නමුත් ඔහුට තම දේශය බේරා ගැනීමට නොහැකි වූ අතරම ඔහු ඇතුළු තම ගෝත්‍රයේ 120 දෙනෙකුට ජීවිතය ද අහිමි විය. කතාව ආරම්භ වන්නේ එතැනිණි.

රතු ඉන්දියානුවන්ගේ ලෙයින් තෙත් වූ බිමෙහි ඉදිකර ඇති ඇමිටිවිලානම් වූ නිවසට අරක් ගත් භූතාත්ම ගැන හා එම මල නොමල ආත්ම නිසා ඔවුන්ට විඳින්නට සිදුවන නොයෙක් බලපෑම් ගැන ලියා ඇති කෘතියකි.

මෙය හොල්මන් කතා ශානරයට අයත් කෘතියක් නිසා හා මෙහි එන සිදුවීම් වලට කුඩා ළමුන් බිය විය හැකි නිසා ඔවුන්ට රාත්‍රී කාළයේදි කියවීමට නොදිය ය්තු කෘතියක් ලෙස මා මේ කෘතිය හදුන්වමි.

එසේම අත්භූත රසය හා කුතුහලය නො අඩුවම ඇති නිසා එක හුස්මටම මේ කෘතිය කියවාගෙන යා හැකි ය.

කතෘ : දිලීප ජයකොඩි
සුරස ෆාස්ට් පබ්ලිශින් ප්‍රකාශනයක්.
මිල රු. 300/=

ජුරාසික් දඩයම | Jurassic Dadayama

මේපල් වයිට් දේශයේ සංචාරය කරන එංගලන්ත ජාතිකයින් කිහිප දෙනෙක්ට විදින්නට සිදුවන අනේක විධ දුක් කරදර හා ඔවුන් පුහුණපාන නොයෙක් සිදුවීම් අලලා ලියැවී ඇති නවකතාවකි.

මේපල් වයිට් නම් වූ පුනරාගමනයේ දේශයට යන ඔවුන්ට විවිධ වූ ඩයිනෝසරයන් හමුවේ. ඇලන් නම් වූ අයෙකුගේ බලාපොරොත්තුව වූයේ මේ ඩයිනෝසරයන් කිහිපදෙනෙක් ව තමාගේ උපන් රටට ගෙන යාමට ය. ඒ ඇමරිකාවට ය.

ඔහු තම සගයන් සමග සතුන් කිහිප දෙනෙක්ව අල්ලා කූඩු කරගෙන පසුව ඇමරිකාවට ගෙන යාමට සැරසුණි. එහෙත් ඔහුගේ අභාග්‍යයට ඒ වන විට ඇමරිකාවේ සතුන් කුර රෝගයකට ගොදුරු වන නිසා පිටින් සතුන් ගෙන ඒම තහනම් කර තිබුණි. මේ නිසාම ඔහු මේ සතුන්ව තාවකාලිකව එංගලන්තයේ සත්වෝද්‍යානයක ගාල් කර තැබී ය.

එදිනෙදා කෑම වේල් හා ව්‍යයාම මදකම නිසා මෙම සතුන් හිතුවාට වඩා ඉක්මනින් වැඩීම සිදු විය.

ඉන් එක් සතෙකු දිනක් කූඩුව කඩාගෙන නගරය පුරාම දිව ගියෙ ය. මේ නිසාම නගරයම භීතියෙන් ඇලී ගිය බව මා අමුතුවෙන් පැවසිය යුතු නොවේ..
ඉන් පසුව සිදුවන්නේ කුමක් ද ?

සර් ආතර් කොනන් ඩොයිල් විසින් රචිත Return to the Lost World නම් කෘතියේ පරිවර්තනයකි.

කතෘ : සර් ආතර් කොනන් ඩොයිල්
පරිවර්තක : චන්දන මෙන්ඩිස්
චන්දන මෙන්ඩිස් ප්‍රකාශනයකි (කතෘ ප්‍රකාශනයක් )
මිල රු. 350/=

හොල්මන් කොරිය | Holman Koriya

අතීත ශ්‍රී විභූතිය ජාවාරම්කරුවන්ගෙන් ආරක්ෂා කර ගැනීමට වෙර දරන පාසල් සිසුන් සමූහයක් වටා ගෙතී ඇති සරල කතාවකි. එසේම මේ කතාව පුරාම අතීත දිගාමඩුල්ලේ තිබූ පෞරාණික නටබුන් ගැන හා ඒවායේ ඇති වැදගත්කම ගැන යම්කිසි විවරණයක් ද ලබා දේ.
මේ නිසාම මෙම පොත වඩාත්ම සුදුසු වන්නේ පාසල් යන දුවා දරුවන්ට ය.

එසේම මේ පොත ලිවීමේදි පැරණි දිගාමඩුලු බස් වහර ද උපයෝගී කරගෙන තිබේ.

පෑ දෙකකට අඩු කාළයක් තුළදී එක හුස්මටම කියවාගෙන යා හැකි සරල රසවින්දනයකින් හෙබි යොවුන් නවකතාවකි.

පියසේන කහදගමගේ මහත්මයාගේ කෘතිවලට ආස කරන ඔබ මේ කෘතියද ආදරයෙන් වැළදගනු නො අනුමාන ය.

කතෘ : පියසේන කහඳගමගේ
සරසවි ප්‍රකාශනයක්
මිල රු. 200/=

අප්පච්චි ඇවිත් | Appachchi Awith

නිස්සංක උපදිසාපති කෙනෙකි. ඔහුගේ පියා මීට අවුරුදු තුනකට පෙර වියෝ විය. පියාගේ වියෝවෙන් අවුරුදු තුනකට පමණ පසු ඔහුගේ පියා නැවත ගෙදර ආවේ යැයි ඔහු සිතයි.

මෙය හුදෙක්ම නිස්සංකගේ සිතේ මැවෙන පියෙකු මිසක් පියාගේ අවතාරය හෝ වෙනයම් කෙනෙකු හෝ නොවේ. පියා නැවත පැමිණියේ යැයි ඔහු තම බිරිඳටද පවසයි. එහෙත් ඔහුගේ බිරිඳට මුලදී තේරුම් ගැනීමට නොහැකි වුවත් පසු කලෙකදී ඈ තේරුම් ගන්නේ නිස්සංක මනෝ ව්‍යාධියකට මුහුණ පා ඇති බවයි.

මේ නිසා නිස්සංකගේ පවුලේ විවිධ අඩදබර වලටද මෙම මනෝ මූලික පියා හේතු වේ. නිවසේ වැඩ කටයුතු මෙන්ම නිස්සංකගේ කාර්යාලීය කටයුතු වලටද මේ මනෝ මූලික් පියා බලපෑමක් ඇති කරයි. මේ නිසා ඔහු කාර්යාලයේ සේවකයින් අතර පවා උපහාසයට ලක් වේ.

පසු කලේක නිස්සංකගේ අතින් සිය පවුලම ඝාතනය වේ. මෙයට හේතුව කුමක් ද ? මෙයත් මනෝ මූලික පියාගේ බලපෑමෙන් සිදුවූ දෙයක් ද ?

වෙනස්ම ආරක කතාවක් වන අප්පච්චි ඇවිත් කෘතිය ඔබත් කියවා බලන්න. 2018 වසරේ ප්‍රසස්ථ නවකතාවට හිමි රජත සම්මානය වන ස්වර්ණ පුස්තක සම්මානය දිනාගත් නවකතාව මෙය වේ.

කතෘ : සමන් වික්‍රමාරච්චි
සරසවි ප්‍රකාශනයක්.
මිල රු. 300/=

හරිම පුදුමයි සහ රෝල් ඩාල්ගේ තවත් කතා | Harima Pudumai saha Roald Dhalge Thawath Katha

ලෝක ප්‍රසිද්ධ ළමා කතා රචක රෝල් ඩාල් විසින් රචිත කෙටි කතා 9ක් එකතු කොට "හරිම පුදුමයි සහ රෝල් ඩාල්ගේ තවත් කතා" නිර්මාණය වී ඇත.

මේ පොතේ සදහන් කතා 9 මෙසේ ලියා දක්වමි.

1. හරිම පුදුමයි
2. අපූරු මිනිසෙක්
3. චිත්‍රය
4.රෑ කෑම
5. ජල කරණම්
6. වයින්
7. ස්වාමිගේ කැමැත්ත
8. පර්යේශණය
9. මගියා

මෙම කතා නමයම එකිනෙකට වෙනස් වූ කතා නමයකි. මේ එක් එක් කතා ඒ කතාවට ආවෙණික වූ රසයක් විදහා පායි. කුතුහලයකින් යුතුව එක දිගටම කියවාගෙන යා හැකි කෘතියක් බව මා විසින් කිව යුතු ය.

එසේම රෝල් ඩාල් දක්ශ කතා රචකයෙකු බව මේ කෘතියෙන් මනාව විද්‍යාමාන වේ.

කතෘ: රෝල් ඩාල්
පරිවර්තක : චන්ද මෙන්ඩිස්
චන්දන මෙන්ඩිස් ප්‍රකාශනයක්
මිල රු.350/=

රැජින | Rajina

එවකට ලංකාවේ රජකම් කරන ලද අනුලා නම් වූ රැජින ගැන සදහන් කෘතියකි. මේ කතාව අනුලා දේවියගේම කතාව යැයි කිව නොහැකි ය. එසේ වන්නේ මේ කතාවේ එන සමහර සිදුවීම් හා සමහර පරිච්ඡේදයන් අතිශයෝක්තියෙන් වර්ණනා කර තිබීම නිසාත්, සමහර සිදුවීම් වල ඇති අධිස්වබාවික ගතිය නිසා ත් ය.

මහළු මහානාග රජතුමාගේ බිසවූ අනුලා දේවිය, පසු කාලීනව තිස්ස රජතුමාගේ ද බිසව වීමට සිදුවි ය. පිරිමීන් කිහිප දෙනෙක් අතින් සල්ලම් වන අනුලා දේවියගේ හිතේ ඇතිවන වේදනාවන් වෙනස්ම කෝණයකින් බලන්නට ඇරයුම් කරන නවකතාවකි.

එසේම මේ නවකතාව තුලින් සමලිංගිකත්වයට යම්කිසි තැනක් ලබා දීමට නවකතාකරු උත්සහ කර තිබෙන බවක් පාඨක මා හට පෙනී ගිය කරුණකි.

මෙම නවකතාව ඉතිහාස කතාවෙන් මදක් අපගමනය වී කිසියම් ෆැන්ටසි ලෝකයකට පාඨකයාව ගෙන යන කතාවක් බව මා පැවසිය යුතු ය. ඔබ අනුලා දේවියගේ ඉතිහාස කතාව දැන ගැනීමේ අභිලාෂයෙන් මේ පොත කියවන්නේ නම් එම පාඨකයින්ට මේ පොත මගින් අසාධාරණයක් සිදුවේ යැයි මගේ හැඟීම වේ.

කතෘ : මොහාන් රාජ් මඩවල
බිසෝ ප්‍රකාශනයක්
මිල රු. 550/=

බැස්කර්විල් දඩ බල්ලා | Baskerwille Dada Balla

ලෝක ප්‍රකට ෂර්ලොක් හෝම්ස් රහස් පරීක්ෂක කතා මාලාවේ දීර්ඝතම කතා හතරෙන් එකකි. The Hound of Baskerville නම් කෘතියෙ අසංක්ෂිප්ත සිංහල පරිවර්තනය මෙය වේ.

බැස්කර්විල් නම් වංශවත් පවුලේ අයවලුන්ව ඉතාමත් අත්භූත ලෙස ඉතාමත් රහසිගතව මරා දමන සුනඛ අවතාරයක් යැයි සැලකෙන මාරක සුනඛයෙකු සම්බන්ධ කතා පුවතකි.

මේ මාරක සුනඛ අවතාරය ඇත්තක් ද ? එසේත් නැත්නම් මේ සුනඛය හැබෑවටම ජීවත්වෙන ජීවියෙක් ද ? එසේ නම් මේ සුනඛයා පිටුපස ඝාතන වලට වග කිවයුතු අය කවරහු ද ?

පියවරෙන් පියවර ඉතාමත්ම සූක්ෂමව පැටළුන නූල් බෝලයක් වන් වූ රහසක් හෙලි දරවු කර ගන්නා රහස පරීක්ෂක කතාවකි.

කතෘ : සර් ආතර් කොනන් ඩොයිල්
පරිවර්තක : ආචාර්ය කේ. ජී. කරුණාතිලක
දයාවංශ ජයකොඩි සහ සමාගමේ ප්‍රකාශනයකි.
මිල රු. 450/=

තනි කකුලේ වීරයා | Thani Kakule Weeraya

සින්නකුට්ටි නම් වූ උපතින්ම රදා කුළයට අයිති දමිල කොල්ලෙකු වටා ගෙතී ඇති යොවුන් කතාවකි.

මේ ගමේ මිනිසුන් රදා කුළයේ මිනිසුන්ට සැලකුවේ ඉතාම පහත් ලෙස ට ය. මේ නිසාම රදා කොල්ලෙකු ව තමන්ගේ එදිනෙදා ක්‍රීඩා කිරීම් වලට ද එකතු කරගත්තේ නැත.

තත්වය එසේ උවත් මේ කතාවේ එන ගැමුණු නම් වූ ළමයා, අනෙකුත් අයවළුන් මෙන් සින්නකුට්ටිව කොන් කළේ නැත. ඔහු සින්නකුට්ටිව තමන්ගේ යහළුවෙකු ලෙස සැලකීය. මේ නිසාම පසු කළෙක අනෙකුත් යහළුවන් ද සින්නකුට්ටි හා සමග හාද විය.

එක්තරා දිනක සිදුවූ සිදුවීමක් නිසා සින්න කුට්ටිගේ එක් පාදයක දනහිසෙන් පහල කොටස ඔහුට අහිමි විය. ඔහුගේ පාදය අහිමි වීමට තරම් ඔහු මුහුණ පෑ අනතුර කුමක් ද ?

ඔහු තනි කකුළේ වීරයෙක් වීම සිදු වූයේ කෙසේ ද ?

එක දිගටම කියවාගෙන යා හැකි සරල බස් වහරකින් යුතු කෘතියකි. එසේම පොතුවිල් පානම ජන ජීවිතයේ එක්තරා පැතිකඩකුත් මේ පොතෙන් විස්තර වේ.

පානමට ඉතාමත් ආදර කරන ගුණසේකර ගුණසෝම විසින් රචිත කෘතියකි.

පින්තූරය : grantha.lk වෙතින්.

කතෘ : ගුණසේකර ගුණසෝම
සූරිය ප්‍රකාශනයක්
මිල රු. 300/=

ගිනියම් ඇස් | Giniyam Es

1974 වර්ෂයේදී සප්ත කන්‍යා කදුවැටියේ හැපුණු  ඩී සී 8 ගුවන් යානයේ සිටි සියළුම මගීන් ජීවිතක්ෂයට පත් විය. ගුවන් යානයේ ගමන් ගත් මගීන්ගෙන් එක් අයෙකු පමණක් අත්භූත ලෙස නොමැරී බේරුණි.

මේ බේරුණු පුද්ගලයා ජීවත් වූයේ මල නොමල පුද්ගලයෙකු ලෙසයි. ඔහුත් ගුවන් අනතුරින් මලේ නම් සැපතක් ලෙස ඔහුට විටින් විට සිතුණේ ය. ඊට හේතුව වන්නේ ඔහුට නොයෙක් දෙනා එල්ල කළ දෝශාරෝපණ හා ඔහුට උත්තර දීමට සිදුවූ ප්‍රශ්ණාවලීන් නිසා ය.

මේ ගුවන් අනතුර සිදුවූ ස්ථානයට ඉතාම ආසන්නතම ගම ජයගත් පුර වේ. ගුවන් අනතුරත් සමග ජයගත්පුර ගමේ අමනුශ්‍ය බියක් හා අත්භූත සිදුවීම් සමුදායකට මුහුණ දීමට ඒ ගමේ වැසියන්ට සිදු විය.

ඉතාමත් අත්භූත ලෙස ගමේ ගැමියන් කිහිප දෙනෙක් මිය යෑමත් සමග මේ තත්වය ඉතාමත් උග්‍ර විය.

ගමේ සිටින ගැමියන් මේ සිදුවීම් සමුදායට මුහුණ දෙන්නේ කෙසේ ද ? මේ අත්භූත සිදුවීම් සියල්ලට හේතුව කුමක් ද ? ඔවුන් මේ අමනුශ්‍ය බියෙන් ගැලවෙන්නේ කෙසේ ද ?

මේ සියළුම ප්‍රශ්න වලට විසදුම ලබා ගැනීමට ගිනියම් ඇස් පොත කියවන්න. අත්භූත කතා යන ශානරයට අයත් කුතුහලයෙන් නො අඩුවම එක හුස්මටම කියවාගෙන යා හැකි අගනා කෘතියකි.

කතෘ : ජයශංඛ කරුණාරත්න
දයාවංශ ජයකොඩි සහ සමාගමේ ප්‍රකාශනයක්
මිල රු. 550/=

ප. ලි. - ගුවන් අනතුර හැරෙන්නට ඒ වටා ගෙතුණු අනෙකුත් සිදුවීම් සමුදාය කතු තුමාගේ හිතළුවක් බව සැලකීම ඉතාම වැදගත් ය.